Kettlingurinn sóttur og fyrsta vikan hjá þér
Það sem þú þarft að vita til að sjá um kettlinginn þinn
Það er að mörgu að huga þegar tekið er á móti nýjum kettlingi. Þú þarft að undirbúa þig vel áður en þú sækir hann og vita hvernig sé best að haga fyrsta deginum og nóttinni sem kettlingurinn er hjá þér. Þar á meðal þarftu að ákvarða hvað þú ætlir að gefa honum að borða.
Fyrstu vikuna er best að koma á rútínu auk þess sem þú ættir að fara með hann til dýralæknis og byrja félagsmótun. Eins er mikilvægt að vita hvernig sé best að kynna kettlinginn fyrir vinum, fjölskyldu, börnum og öðrum gæludýrum. Jafnframt þarftu að átta þig á hvernig sé best að haga fyrstu ævintýrum hans utandyra þegar bólusetningu er lokið.
Ertu tilbúin/n til að sækja kettlinginn þinn?
Mikilvægt er að þú sért að fullu tilbúin/n áður en þú sækir kettlinginn. Gakktu úr skugga um að þú hafir gert heimilið kettlingavænt og fullbúðu eitt herbergi með því að setja þangað allt sem hann þarfnast, þar á meðal rúm, matar- og vatnskálar, kattakassa og leikföng.
Þú þarft jafnframt kattabúr til að flytja kettlinginn þinn og fóður af sömu tegund og fyrri eigandi hefur verið að gefa honum. Það er líka góð hugmynd að finna dýralækni sem þú treystir og panta tíma í skoðun nokkrum dögum eftir að þú hefur sótt kettlinginn.
Hvað þarftu að gera áður en þú sækir kettlinginn þinn?
Gakktu úr skugga um að heimilið sé öruggt fyrir kettlinginn og settu upp aðstöðu þar sem hann á að halda til. Þú þarft líka að hafa ferðabúr fyrir hann. Best er að vera búinn að finna dýralækni svo þú getir bókað tíma nokkrum dögum eftir að kettlingurinn kemur heim með þér.
Hversu gamall ætti kettlingurinn að vera þegar þú ferð með hann heim?
Þú ættir aldrei að taka að þér kettling yngri en átta vikna og sumir ræktendur halda kettlingum hjá mömmunni og gotsystkinum til 12 vikna aldurs. Á þeim aldri ætti kettlingurinn að vera farinn að borða fasta fæðu og kominn með nægan félagsþroska til að eiga samskipti við aðra ketti. Milli átta og 16 vikna byrjar kettlingurinn að finna sinn sess á heimilinu svo það er góður tími til að styrkja aðlögunina á heimilinu.
Hvenær er besti tíminn til að taka kettling heim?
Best er að sækja kettlinginn þinn þegar þú hefur nokkra rólega daga til að verja með honum heimavið og þú átt ekki von á neinum gestum. Reyndu að sækja hann að morgni svo hann hafi tíma til að venjast heimili þínu fyrir nóttina.
Að hverju ættir þú að spyrja fyrri eiganda kettlingsins þíns?
Spurðu hvaða fóður kettlingurinn borðar og hvernig fóðurvenjur hans eru. Spurðu líka hvort hann noti kattakassa. Kannaðu hvort hann er búinn að fara til dýralæknis, fá bólusetningu og ormalyf og hvort búið er að örmerkja hann. Spurðu líka hvaða leikfang sé í mestu uppáhaldi hjá honum.
Ef hægt er, skaltu skilja leikföng og teppi eftir hjá kettlingnum í nokkra daga áður en þú sækir hann. Lyktin af nýja heimilinu verður þá orðin kunnugleg og róar kettlinginn á leiðinni heim og þegar hann kemur heim.
Hvað ættirðu að taka með þér þegar þú sækir kettling?
Hver sem ferðamátinn er, ættirðu að taka með þér kattabúr vegna þess að það er hættulegt að hafa kettling lausan í bíl og hann gæti sloppið ef þú ert gangandi eða ferðast með almenningssamgöngum.
Veldu búr sem mun rúma kettlinginn þinn þegar hann verður fullvaxinn og bættu við teppi til að auka þægindin. Myrkvað búr mun auka öryggiskennd kettlingsins þíns. Og mundu að taka bréfþurrkur og teppi til skiptanna ef slys verða meðan á ferðinni stendur. Hafðu burðarbúrið nærri þér á meðan á ferðinni stendur svo þú getir róað kettlinginn þinn.
Hvernig geturðu gert heimferðina þægilegri fyrir kettling?
Ef þú ert á bíl skaltu halda öllu rólegu og keyra varlega til að bregða ekki kettlingnum. Festu annað hvort kattabúrið með sætisbelti til að koma í veg fyrir að það renni til eða láttu annan farþega halda því föstu.
Til að veita kettlingnum öryggi skaltu setja þunnt teppi yfir kattabúrið og hafa leikföng eða teppi sem hann þekkir lyktina af með í búrinu. Öruggast er að hafa hann í búrinu meðan á ferðinni stendur, en þú getur auðveldað honum að halda ró sinni með því að tala blíðlega við hann.
Fyrsti dagur kettlingsins á nýja heimilinu
Sjáðu til þess að friður og ró ríki á heimilinu
Kettlingurinn getur orðið stressaður, nýfarinn frá mömmu sinni og kominn í nýtt umhverfi með nýrri lykt, nýjum hljóðum og nýju sjónrænu áreiti. Þú skalt því sjá til þess að friður og ró ríki á heimilinu.
Leyfðu kettlingnum að skoða sig um
Þegar þú kemur heim skaltu setja kattabúrið í herbergi sem þú hefur undirbúið fyrir kettlinginn og opna dyrnar. Leyfðu honum að koma út og kanna umhverfið á eigin hraða og forðastu freistinguna að knúsa hann strax.
Sýndu kettlingnum rúmið sitt
Eftir að kettlingurinn þinn hefur kannað herbergið sitt gæti hann verið tilbúinn í lúr svo þú skalt sýna honum rúmið sitt í stað þess að leika við hann. Gakktu líka úr skugga um að hann viti hvar kattakassinn hans er staðsettur.
Fylgstu með kettlingnum þínum
Kettlingurinn þinn kann að vera hlédrægur í byrjun en smám saman mun hann byrja að skoða sig um. Ef engar hættur eru á heimilinu fyrir kettlinginn, skaltu leyfa honum að skoða sig um en hafðu samt gætur á honum. Þú getur líka haft hann í eigin herbergi, ekki síst ef á því eru gluggar. Sjáðu samt til þess að hann hafi nægan félagsskap fyrstu vikurnar.
Vertu á staðnum
Kettlingar ættu ekki að vera lengi einir heima fyrr en eftir fjögurra mánaða aldur. Þú getur vanið kettlinginn á að vera einan heima í stutta stund í einu. Þá byrjar þú að fara í burtu í nokkrar mínútur og lengir svo tímann smám saman. Stundum getur verið heppilegt að taka tvo kettlinga inn á heimilið á sama tíma en það er misjafnt eftir kattakynjum.
Gefðu honum sitt pláss
Kettir þurfa að skipuleggja yfirráðasvæði sitt þannig að svæðin þar sem þeir matast, hvíla sig, þrífa sig (klósettferðir) og leika sér séu aðskilin. Fylgstu með hvernig kettlingurinn notar rýmið og gerðu breytingar ef nauðsyn krefur svo honum líði vel. Þú gætir til dæmis þurft að færa rúmið hans hærra eða kattakassann lengra frá matarsvæðinu.
Fyrsta nótt kettlingsins á nýja heimilinu
Veittu öruggan svefnstað
Til að kettlingar haldi heilsu og þeim líði vel þurfa þeir að sofa mikið. Þeir þurfa að geta hvílt sig á rólegum stað þar sem þeir finna til öryggis. Kettlingurinn getur sofið í 20 klukkutíma á sólarhring og þegar hann fullorðnast þarf hann allt að 18 tíma svefn á sólarhring.
Besta kettlingafóðrið og fóðrunarvenjur
Haltu sama mataræðinu til að byrja með
Hvers kyns skyndilegar breytingar á mataræði kettlingsins geta valdið meltingartruflunum og streitu. Þess vegna skaltu fyrstu vikuna gefa kettlingnum sama fóður og fyrri eigandinn gaf honum. Svo geturðu smám saman skipt yfir í annað fóður ef þú vilt, og valið kettlingafóður sem hentar aldri hans.
Veittu rólegan stað til að borða
Þetta ætti að vera þar sem kettlingnum finnst hann vera öruggur, fjarri þeim stað sem þú og önnur gæludýr borða. Köttum finnst ekki gott að borða of nálægt kattakassanum sínum og þeir ættu ávallt að hafa aðgang að hreinu vatni. Það er mikilvægt að halda vatnskálum frá matnum til að forðast að það sullist á milli.
Ekki gefa kettlingnum mjólk eða mola af matarborðinu
Eftir afvenslun missa kettlingar getu til að melta sykur úr mjólkinni og þeir geta fengið niðurgang af kúamjólk. Ef þú gefur kettlingi mola af matarborðinu gæti hann vanist á að sníkja eða orðið veikur og of þungur af því að borða rangt fæði.
Ekki hafa áhyggjur þótt kettlingurinn hafi litla matarlyst
Streitan sem fylgir því að flytja á nýtt heimili getur dregið úr matarlyst kettlingsins í byrjun en þegar hann verður heimavanur ætti matarlystin að komast í eðlilegt horf. Það er líka gott að hafa hugfast að köttum er ekki eðlislægt að borða stórar máltíðir. Þeir borða frekar margar litlar máltíðir á dag. Ef þú hefur áhyggjur af matarvenjum kettlingsins þíns skaltu ráðfæra þig við dýralækni.
Að breyta mataræði kettlingsins með öruggum hætti
Farðu með kettlinginn til dýralæknis
Dýralæknir þarf að skoða kettlinginn þinn nokkrum dögum eftir að þú tekur hann heim með þér. Þá heilbrigðisskoðar hann kettlinginn og gerir bólusetningaáætlun. Auk þess getur hann ráðlagt þér varðandi ormahreinsun, næringu og fleira.
Ferðast í bíl
Notaðu burðartösku eða búr fyrir kettlinginn
Lestu um umhverfisþjálfun kettlingsins þíns
Þú berð ábyrgð á því að kötturinn þinn öðlist sjálfstraust og venjist umhverfi sínu. Þú getur umhverfisþjálfað hann með því að sjá honum smám saman fyrir nýrri lífsreynslu og hughreysta hann af nærgætni.
Að kynna ný hljóð fyrir kettlingnum
Hljóð geta brugðið kettlingum og gert þá órólega, svo þú skalt kynna kettlinginn þinn reglulega fyrir nýjum hljóðum meðan þú hughreystir hann. Þetta gætu t.d. verið tónlist eða hljóð frá þvottavél eða hárþurrku. Passaðu þig á að kynna aðeins ný hljóð svo lengi sem kettlingurinn virðist vera rólegur yfir því.
Hjálpaðu kettlingnum að skoða sig um
Kettlingurinn mun þurfa að ráða við yfirborð af ýmsu tagi. Þú getur hjálpað honum að venjast með því að sýna honum í rólegheitunum stiga, klifurtré innanhúss og yfirborð af ýmsu tagi.
Vendu kettlinginn þinn við meðhöndlun
Dýralæknirinn þinn mun vilja skoða kettlinginn þinn ítarlega. Til að koma í veg fyrir að þetta geri hann órólegan er best að venja kettlinginn varlega við að vera tekinn upp og meðhöndlaður.
Leiktu við kettlinginn
Gefðu þér tíma til að leika þannig við kettlinginn að þú hvetjir hann varlega til að sýna eðlislæga hegðun eins og að læðast að, stökkva á og slá í.
Félagsmótun kettlinga
Fyrsta heimsókn kettlingsins þíns til dýralæknis
Það er mjög mikilvægt að fara með kettlinginn til dýralæknis í skoðun eftir að hann hefur fengið nokkra daga í að koma sér fyrir hjá þér. Með því að undirbúa þig vandlega geturðu tryggt að það sé jákvæð upplifun fyrir kettlinginn. Og þú getur notað tækifærið til að læra meira um hvernig sé best að sjá um hann.
Kettlingurinn gæti verið í ójafnvægi eftir flutninginn á nýja heimilið, en þú getur hjálpað honum að halda ró sinni. Hreyfðu þig alltaf hægt og rólega og meðhöndlaðu hann mjög varlega. Notaðu blíða rödd og veittu stöðuga hughreystingu eftir því sem þú kynnir hann fyrir nýjum aðstæðum, hljóði og lykt. Passaðu þig einnig á að halda fjölda gesta í lágmarki til að byrja með.
Dagleg rútína kettlingsins
Að nota kattakassann
Fóðrun
Fylgdu sömu rútínu og fyrri eigandi kettlingsins fyrstu vikuna. Eftir það geturðu smám saman fært þig yfir í þá rútínu sem þú vilt hafa. Þrír meginvalkostir eru í boði:
- Settu fram daglegan þurrfæðisskammt kettlingsins þíns og leyfðu honum að narta í hann að eigin geðþótta.
- Gefðu honum nokkrar litlar máltíðir á dag.
- Settu fram minni skammt af þurrfæði sem hann getur gengið í að vild en gefðu blautfæði á ákveðnum tímum.
Hvaða kost sem þú velur ættirðu að halda þig við hann svo kettlingurinn læri við hverju er að búast.
Að leika
Passaðu upp á að allir fjölskyldumeðlimir verji tíma í að leika við köttinn og mynda tengsl við hann. Leiksvæðið er mikilvægasti hluti yfirráðasvæðis þeirra og þeir þurfa pláss til að hlaupa, klifra og fela sig. Kettir elska sérstaklega að vera hátt uppi, svo ef þú ert ekki með nógu marga staði sem kötturinn getur tyllt sér á er skynsamlegt að kaupa kattatré.
Hegðun og þjálfun
Þótt þú eigir alltaf að koma fram við kettlinginn þinn af nærgætni er mikilvægt að honum séu sett mörk. Ein besta leiðin til að fá kettling til að láta af óæskilegri hegðun, eins og að róta í ruslinu, er að draga athygli hans að leikfangi og segja „nei“ eða annað einfalt orð.
Hreyfing
Einn virkasti tími dagsins hjá köttum er þegar rökkva tekur. Kettlingurinn mun hafa sérstaklega gaman af því að leikið sé við hann á þeim tíma, sem mun jafnframt þreyta hann fyrir háttatímann. Eins eru kettir virkir við dögun. Ef þú vaknar ekki snemma að jafnaði gætirðu prófað að gefa kettinum leikfang sem gefur honum fóður þegar hann leikur með það. Þannig getur hann haft ofan af fyrir sér snemma á morgnana.
Staðsetning rúms
Settu rúm kettlingsins á þann stað sem þú ætlar að hafa hann allan fullorðinsaldurinn, því þegar hann er byrjaður að sofa einhvers staðar er ekki auðvelt að breyta staðsetningunni. Þótt rúm kettlingsins þurfi að vera á rólegum stað er best að hafa það frekar nálægt þeim hluta heimilisins þar sem þú verð mestum tíma, því hann hefur gaman af að fylgjast með þér.
Samkvæmni
Gakktu úr skugga um að kettlingurinn þinn hafi allt sem hann þarf á að halda, kattakassa, ferskt vatn, fóður, skemmtilegt leikfang og teppi. Gefðu honum síðan merki um háttatíma með því að slökkva ljósin. Hann kann að væla fyrstu næturnar en fljótlega lærir hann að þú kemur til hans að morgni og reglufesta eykur öryggistilfinningu hans.
Kettlingurinn þinn getur byrjað að fara út undir eftirliti þegar búið er að endurbólusetja hann og gelda. Hann er samt ekki tilbúinn að vera eftirlitslaus úti fyrr en í kringum sex mánaða aldurinn.
Auk þess að tryggja að kettlingurinn þinn sé fullbólusettur þarftu að athuga:
- Að hann sé auðkenndur með örmerki og hálsól með merkispjaldi. Ólin þarf að passa vel um hálsinn á kettlingnum. Ógeldum fressum má ekki hleypa út.
- Að garðurinn sé öruggur fyrir kettlinginn.
- Þú veist hvað kettlingnum þínum finnst skemmtilegast svo þú getur lokkað hann aftur inn með því.
Áður en kettlingurinn þinn fer út án eftirlits þarf jafnframt að gelda hann til að koma í veg fyrir óæskileg got.
Fyrsta ferð kettlingsins þíns utandyra getur verið yfirþyrmandi, en hér eru nokkrar leiðir til að tryggja að upplifunin verði jákvæð:
- Veldu rólegan tíma og haltu börnum og öðrum gæludýrum í burtu.
- Farðu út fyrir kvöldmat svo að þú getir notað mat kettlingsins til að laða hann inn aftur.
- Gakktu með kettlingnum þínum meðan hann skoðar sig um svo hann týnist ekki.
- Skildu hurðina eftir opna svo hann sjái hvernig hann kemst aftur inn.