Að þjálfa kettlinginn
Hvers vegna að þjálfa kettlinginn þinn?
Gott fyrir andlega og líkamlega heilsu hans
Að tvinna þjálfun inn í leiktíma kettlingsins hjálpar honum að nýta alla aukaorkuna til góðs og heldur honum hamingjusömum, virkum og heilbrigðum. Með því að kenna kettlingnum nýja færni og hjálpa honum að auka snerpuna geturðu einnig aukið andlega örvun hans.
Það er hollt fyrir kettlinga að læra að hegða sér vel
Margir kettlingar bíta og klóra. Áður en klær og tennur eru fullþroskaðar geta þeir lært æskilega hegðun í gegnum leik, hvað má og hvað ekki.
Þá verða þeir ekki jafn áhyggjufullir í nýjum aðstæðum
Öðru hvoru getur verið nauðsynlegt að klippa klærnar á kettlingnum þínum. Dýralæknirinn getur gert það. Þjálfun hjálpar kettlingnum þínum að takast á við nýja lífsreynslu og nýjar aðstæður án þess að verða órólegur eða verða árásargjarn.
Heima er best
Þegar talað er um að þú þjálfir köttinn þinn er ekki átt við að þú kennir honum kúnstir. Þá er einfaldlega átt við að þú kennir honum að nota kattakassa, sérstaka kattaklóru til að brýna klærnar eða koma þegar þú kallar á hann. Allt þetta styrkir köttinn og gerir að verkum að honum líður vel á heimilinu.
Að kenna kettlingnum að þekkja nafnið sitt
- Veldu stutt nafn sem er ekki með of mörgum atkvæðum. Þetta auðveldar kettlingnum að þekkja það
- Kallaðu á kettlinginn með nafni þegar eitthvað stendur til eða þú vilt leika við hann og endurtaktu nafnið meðan á athöfninni stendur. Þessi jákvæða styrking mun hjálpa kettinum að þekkja nafnið
- Reyndu að endurtaka ekki nafnið þegar þú refsar kettlingnum þar sem þetta gefur nafninu neikvæða merkingu
- Segðu nafnið og gefðu honum strax nammi
- Eða segðu nafnið og rúllaðu til hans pappírskúlu
- Kettlingar eru oft móttækilegri þegar þeir eru svangir. Þess vegna er gott að gera þessar æfingar fyrir matmálstíma.
Hvernig þjálfa á kettlinginn í að nota kattakassa
Flestir kettlingar læra grunnatriði kassaþjálfunar með því að fylgjast með móður sinni. Ef kettlingurinn þinn kann hins vegar ekki að nota kattakassa kemur í þinn hlut að sýna honum hvað skuli gera. Með því að kassavenja kettlinginn þinn áður en hann þróar með sér slæma hegðun getur þú sparað bæði honum og þér umtalsverðan kvíða og streitu.
Aðskildir kattakassar í rólegu umhverfi
Settu kattakassa kettlingsins í rólegt horn á heimilinu. Ef þú átt aðra ketti skaltu tryggja að þessi kassi sé aðskilinn frá hinum.
Notaðu sams konar kattasand
Notaðu sams konar kattasand og kettlingurinn þinn er vanur. Ef þú ert ekki viss um hvers konar sand hann notaði gætir þú þurft að prófa nokkrar tegundir.
Notkun eftir máltíðir og svefn
Strax eftir að kettlingurinn hefur borðað eða sofið skaltu setja hann í kattabakkann. Síðan, ef kettlingurinn þinn leyfir þér, skaltu taka eina af loppunum og krafsa með henni í sandinn.
Fylgstu með líkamstjáningunni
Vertu viss um að þú fylgist með kettlingnum þínum á öðrum tímum. Ef hann lítur út fyrir að þurfa að svara kalli náttúrunnar skaltu einfaldlega setja hann í kattakassann.
Ekki refsa
Ekki refsa kettlingnum þínum þótt hann geri óvart þarfir sínar fyrir utan kattakassann. Refsing hefur bara neikvæð áhrif.
Af hverju notar kettlingurinn minn ekki kattakassann?
Ýmsar ástæður geta verið fyrir því að kettlingurinn þinn vill ekki nota kattakassann. Hér eru tilteknar nokkrar algengar ástæður:
Hreinlæti
Það er mikilvægt að þrífa kattakassann daglega. Fjarlægðu sandinn sem lyktar og bættu nýjum kattasandi í kassann.
Stærð
Hugsanlega er kattakassinn of lítill og óþægilegur fyrir kettlinginn
Staður
Ef kattakassinn er á stað þar sem er mikill umgangur eða hávaði, eða nálægt fóður- eða vatnsskálum, getur kettlingnum þótt óþægilegt að nota hann.
Slæm reynsla
Það er mikilvægt að fylgjast ekki með eða trufla kettlinginn þinn meðan hann er í kattakassanum því það gæti skapað neikvæð hugrenningatengsl
Hvernig þjálfa á kettling í að nota klórustöng
Kettlingum er eðlislægt að brýna klærnar. Til að hjálpa kettlingnum að gera það án þess að skemma húsgögn er góð hugmynd að fjárfesta í klórustöng og þjálfa hann í notkun hennar þegar hann kemur fyrst inn á heimilið.
Lokkaðu hann með lyktinni
Kettlingurinn þinn hefur ótrúlegt lyktarskyn, allt að fjórtán sinnum næmara en mannfólkið. Ef þú úðar húsgögnin með sítrónulykt, heldur kettlingurinn sig fjarri þeim. Forvitnum ketti finnst klórugrind sem búið er að úða með lykt af garðabrúðu eða kattamyntu (catnip) mjög spennandi.
Láttu klór verða hluta af leiktímanum
Ef þú setur uppáhaldsleikföng kettlingsins á klórustöngina, dregur fjöður yfir yfirborð hennar eða festir mjúkan pappír á hana mun það hvetja hann til að nota klærnar á uppbyggilegan hátt í leiktímanum. Það mun einnig festa staðsetningu klórustangarinnar í minni hans.
Hrósaðu kettlingnum fyrir að klóra
Í fyrsta sinn sem kettlingurinn þinn klórar í klórustöngina skaltu hrósa honum og strjúka. Sumir áhrifagjarnir kettlingar munu þá tengja klórið við mannlega ástúð og hvatningu.
Af hverju notar kettlingurinn minn ekki klórustöngina sína?
